സര്വ്വേ കല്ലിന്റെ വേരിന്
ഔഷധ ഗുണമുണ്ടെന്ന് പറഞ്ഞത്
മല കയറിയിറങ്ങി വന്ന
മൂക്കിന്മേല് കണ്ണട വെച്ചയാളാണ്.
-കേട്ട പാതി കേള്ക്കത്ത പാതി-
കര്ക്കിടകക്കഞ്ഞി മൂടിവെച്ച്,
മഴ തോരുന്നതും കാത്ത്
കോരന്മാരെല്ലാവരും പുറത്തേക്കു കണ്ണെറിഞ്ഞു.
കണ്ണടക്കിരിക്കാന് നല്ല മേശ കിട്ടിയ നേരം
വേരു പറിക്കാന് മൂന്നു മൂഷികരിറങ്ങി,
മുമ്പേ എത്തിയ (വ്യാജ)രേഖയുള്ള എലികള്
വിഷം തീണ്ടി മൂഷികരെ കൊന്നൂ.
നേരം പുലര്ന്ന നേരം, കോരന് കണ്ടതിങ്ങനെ-
വിളക്കിന് തിളക്കം കണ്ടണഞ്ഞ പാറ്റകള്
കൂടുതല് തിളക്കം കൊതിച്ച് തിരിയില് എരിഞ്ഞടങ്ങി
കോരന്റെ കഞ്ഞി പഴങ്കഞ്ഞിയായ്
വലിച്ചെറിഞ്ഞ കുമ്പിള് തേടി കോരന് പുറത്തിറങ്ങി...