12 September, 2009

ഉറക്കം കെടുത്തുന്നത്...

എന്‍റെ കണ്‍കോണിലെ
നിന്‍റെയോരോ പീളകെട്ടിയ കാത്തിരിപ്പും
ഓരോ ശ്രമങ്ങളായിരുന്നെന്ന്
ഞാനെന്തേ അറിയാതെപോയീ

ഉണര്‍വ്വിന്‍റെ ഓരോ പുലരിയും
രാക്കറുപ്പിന്‍ തോല്‍വിയായും
പകല്‍തിളക്കത്തിന്‍ വിജയമായും
എന്‍റെ ധാരണകളില്‍ കൊറിയിട്ടതെന്തേ

രാവിന്‍റെ മറവുകളില്‍
തളര്‍ച്ചയുടെ ശയനങ്ങളില്‍,
പാതിവഴിയില്‍ മടങ്ങാന്‍ ഹേതു
കണ്ടുതീരാത്തയെന്‍റെ സ്വപ്നങ്ങളായിരുന്നോ

ചെറിയ ചെറിയ മയക്കങ്ങള്‍
കൂട്ടിക്കെട്ടിയൊടുവില്‍
മരണത്തിനു കൂട്ടിരുന്നയെന്‍റെ
ഉറക്കമേ ഞാനറിയുന്നുവിന്ന്
തണുത്തുറഞ്ഞയീ നിശ്ചലത,
കാത്തിരിപ്പിന്‍റെയൊരു ദീര്‍ഘായുസ്സ്..